Market mein hulchul...

Ustad Charan Biryanee Kha[n] markit mein ek din guzar rahe the, unke begumne unko sabji leke aane ki hukum jo dee thi. Ustaad Charan Biryanee Kha[n] kuch jaane pehchaane hone ke wajah se kaeen log salaam kiye. Aur bhaag gaye. Utni, uh, kadar karte jo the.

Ustaad Charan Biryanee Kha[n] Nehru gali mein jaate rahe ki achaanak unke priy shishy Anmol (jinka last name Ratan tha) ke oopar unki nazar pad gayi. Anmol miyaan coffee shop mein chaay peete kisi pustak mein doob mar rahe the (weh "doobe huen" nahin, "doob mar rahe the" kyoon ki unko pichle hafte heen Urdu ke akshar sikhaya gaya tha) aur isi liye Ustad ke aahat ko pehchaane nahin. Warna weh bhi chalaang marke...uh apni kadar dikha dete.

Ustaad unke back par ek slap karke, Anmol miyaan ke baaju bench pe bait gaye. Anmol miyaan ke hosh aate heen weh bhaagne ki koshish kee thee, par Ustad salaam ke bajaay jamke hug kar rahe the tho Anmol miyaan ko wapas bench par baitna pada. Unke sir par paseena nikalna shuru ho gaya. Unhone ek green rang ki ek rumaal nikaalke usko ponch dee.

Anmol miyaan Ustad ke shishy apne khushi se nahin, par apne Ma ki aakhri ichchaa poora karne ke liye unke shishy ban chuke the. Aap mujhe galat na samjhe - Anmol miyaan shayad Ustaad ke yahan phir bhi shiksha ke liye jaate. Shayad. Aur unke Ma ke maanasik santulan theek nahin hone ke baare mein saalon se khabar phehli thee. Weh jab bhi public mein dikhaai padte tho koi na koi unko paththar maar deta. Par Anmol miyaan shayad apne taraf se bhi Ustaad ke yaha shaamil ho sakte the. Shayad. Aur waise bhi Anmol miyaan ki kismat waise bhi phooti thee...

Apne heen wachan se bandhe hone ke wajah se, Anmol miyaan hichakte huen Ustad ke yahaan shishy ban gaye the. Jab bhi Ustaad ko dekhte tho Anmol miyaan ko apni Ma ki yaad, aur us dukh bhari pal (unke Ma ki gujarne ki, Ustaad ke yahaan shamil hone ki nahin) yaad aa jaata. Anmol miyaan apne paakit mein se ek batuwaa nikaalke, apne Ma ki ek gandi black and white tasveer ko nihaare. Unke Ma us tasveer mein phoot phoot ke has rahi thee. Anmol miyaan ke aankhon mein aansoon nikal aayee.




Ustad unse pooche: "Anmol miyaan, aap ro kyoon rahe hai? Roiye mat, us se kuch bhi hal nahin hota hai. Mujhse poochiye, main jaanta hoon majbooriyon ke baare mein. Maine isi ke baare mein ek shaayari bhi likh chuka hoon." Ustad wahin pause kiye, par Anmol miyaan kuch pooche nahin - woh apne ghum mein doobe hue the. Ustaad phir se try kiye - "Kya aap mere shayari sunenge?" Anmol miyaan apna sar "Nahin!" bolte huen hilaaye, par Ustad jaldi se nazar pher liye aur unke ishaaron ko ignore karte huen aage nikal pade. Anmol miyaan ke aansoon thoda aur mote ho gaye.

"Tho haazir hain...

Bhejthi hai hume sabji le aane ko,
Pehchaanti nahin hamari asli kaabilyat,
Batata, pyaas ke chakkar mein lage rahthe hai hum,
Hamaare haaton kat jaatee hain tamaatar sata sat.

Biwi hai hamaaree moti bhains jaisi,
Akal bhi utni hai, moti bhains ki jitni,
Haso mat mere humdard, mere doston,
Chalees minit ki baath-cheeth hoti hai roz beech un dono ki.

Pooch rahi thi us din kisi guzarti bhains ko -
Kaali thi bhains sab bhains jaisi -
Pata nahin biwi pehchaan kaise leti hai sabko,
Hogi rishtedaar kisi na kisi janam ki.

'Tumhaari maa kaisi hai, tumhaare bacche kaise hai,
Tumhaara khaandaan kya hai theek thaak?'
Utsukta se biwi pooch na rahee thee aangan se,
Mundi hila rahi thi woh bhains sadak pe kya khaak?

Aisi jab humdardi hain un donon ke beech mein,
Aisi jab sahi salaamat hai yeh jodi,
Aisi jab hain pyaar aur mohabbat beech unke,
Markit nahin gaya tho kuchla jaaoonga thodi.

Shaayari ki ma-behn ho jaati hai,
Labz sil jaate hai kahi na kahi,
Par karoon tho main karoon kya,
Thoda muhje hai jaan pyaaree.

Sheher ke kone kone jasoos chipe hote hain,
Baat sunte rehthe hai kaalee bhains meri,
Kisi slim and trim item se baat karoon tho,
Khabar pahunch jaati hai Moti ko turanth hee.

Is mahol se bachaale eh Khuda,
Uthale meri biwi bhains ko jo hai pyaree,
Talaak tho nahin de sakta hoon usko,
'Bhains se shaadi' suna hai kabhi?"

Kasht hoga yeh kaam zara,
Badan dard hoga do teen mahine ki,
Par uthale mere sir se yeh bala,
Seh sakte tho aap hain, mai nahin."

Ustaad unke priy shishy Anmol miyaan ke oar dekhthe thoda muskurae, par Anmol miyaan bahot ro rahe the. Ustaad samjhe ki Anmol miyaan shayari mein bhare dard ke wajah se ro rahe the. Ustaad apne bhavanaon mein kho gaye. Unke man ke mehfil mein sainkdo log jamkar unke oopar phool barsa rahe the. Unke shoulder ke oopar leke jhoom rahi thi poori audience. Sab oar se "Wah wah!" ki goonj ho rahi thi, aur sainkdo, karoron logon ke naachne se dharti dham dham kar rahi thi. Ustad Charan Biryaanee Kha[n] jannat mein the, aur unke mooh par ek nanhi si ek haseen aayee.

Anmol miyaan jo ab tak apni phooti kismat ke oopar aansoon baha rahe the achanak "USTAAD BHAAGOOO!!!" chillakar bhaag gaye. Ustad Charan Biryaanee Kha[n] apne peeche mudkar dekhe tho sainkdo karoro bhains unka peecha karte huen bhaagke aa rahe the.